বসন্ত বিশেষ সংখ্যাঃ
“কৃষ্ণাইৰ মূৰৰে বকুলফুল এপাহি নিয়ৰ পাই মুকলি হ'ল ঐ...গোবিন্দাই ৰাম”
এনেদৰেইঅসমীয়াৰ প্ৰাণত বিয়পে ব'হাগ।ডালৰ কপৌ, নাহৰ,কুলি-কেতেকীৰ মাতত জীপাল হয় ব'হাগী দুপৰীয়াবোৰ।মনেৰে ব'হাগক আদৰিবলৈ সাজু হয় প্ৰত্যেক জন অসমীয়া।ঢোল-পেপাৰ মাতত বুকু কপে চেনাই-চেনেহীৰ,প্ৰত্যকজোৰা হুঁচৰিৰ আশীষত ধন্য হয় অসমীৰ বুকু...এয়া আছিল আগৰ ব'হাগ।
এতিয়াৰ ব'হাগৰ সংজ্ঞা বেলেগ হ'ল।এতিয়াৰ ব'হাগৰ হুঁচৰিৰ আশীষ লোৱাৰ সুযোগ নাপায় প্ৰত্যেক জন অসমীয়াই।কাৰণ মনৰ ধনী হ'লেও টকাৰ ধনী হ'ব নোৱাৰে সকলো।এতিয়াৰ ব'হাগী হুঁচৰিৰ আশীষ জোখা হয় টকাৰ পৰিমাণেৰে।এতিয়াৰ হুঁচৰিয়ে শুৱনি কৰে সেইখন চোতাল যি চোতালত নাচনিৰ ভৰি পিছলে মাৰ্বল পাথৰৰ ওপৰত।চোতালৰ দূবৰি বন আৰু এতিয়া ঢুলীয়া-নাচনীৰ ভৰিৰ খোজত নমৰে,কাৰন দূবৰিত নাথাকে টকাৰ সুৱাস,থাকে কেৱল কেচা মাটিৰ গোন্ধ।
কিহৰ বাবে এই বৈষম্য।কি বিছাৰিছো আমি–নিজেই নিজৰ ওচৰত হেৰাই গৈ থকা নাইনে??ব'হাগ আমাৰ উশাহ,ৰঙালী আমাৰ প্ৰাণ–ইয়াতো টকাৰ জোখ কিয়??যি সকলে ১০০১ টকাৰ ওপৰত হুঁচৰিৰ শৰাইখন শুৱনি কৰিব নোৱাৰে তেওঁলোকৰ এই আশীষ লোৱাৰ অধিকাৰ নাই নেকি??আমাৰ ককা-আজোককাৰ দিনতটো এই বৈষম্য নাছিল!তেনেহ'লে আমাৰ মনত এই বৈষম্য কিহৰ বাবে??আৰু এই বৈষম্যৰ ভাব লৈ আমি কেনেদৰে ক'ব পাৰিছো যে ৰঙালী আমাৰ বাপতিসাহোন উৎসৱ??আচলতে আমি বাৰে-বাৰে অপমান কৰিছো আমাৰ উপৰিপুৰুষসকলক।
এনেদৰেই হেৰুৱাইছো আমি আমাৰ অস্তিত্ব।কাৰন এনেধৰনৰ বৈষম্যৰ বলী হৈয়ে আমি বুকু ডাঠি ক'ব নোৱাৰো যে আমি অসমীয়া,আমি সচাকৈয়ে পাহৰি পেলাইছো ব'হাগৰ সংজ্ঞা।।
প্ৰকাশ পালে অসমীয়া ফ্লিপিং আলোচনী শব্দ-সাঁকোৰ বসন্ত বিশেষ সংখ্যাটি। আলোচনীখন পঢ়িবলৈ তলৰ Download লিংকত ক্লিক কৰক।
No comments:
Post a Comment