বসন্ত বিশেষ সংখ্যাঃ
বৰ্তমান সময়ত দেখা গৈছে যে পৰিৱৰ্তনৰ বতাহ জাকে আমাৰ প্ৰকৃতিলৈও পৰিৱৰ্তন আনি দিছে। আজিকালি বৃহৎ অট্টালিকা, কল-কাৰখানা, ৰাস্তা -ঘাট আদি বনোৱাৰ ফলত ডাঙৰ গছবোৰ কাটি নোহোৱা কৰিছে।যাৰ বাবে কুলি-কেতেকী চৰাইৰ মাত নুশুনাৰ দৰে হৈছৈগৈ। আগতে কুলি -কেতেকীৰ মাতত বিহু অহাৰ আগজাননী পোৱা যায়। আজিকালিৰ নৱ প্ৰজন্মই কেৱল ছবিৰ জৰিয়তেহে যেন চৰাইবোৰৰ লগত চিনাকি হোৱা দেখা যায়।
আগতে গাঁৱৰ জীয়ৰী বোৱাৰীয়ে বিহুৰ সময়ত তাঁতৰ শালত ৰুমাল, গামোচা, টঙালি বৈ মাকুৰে খিটখিটাই থাকে।গৰকা আৰু মাকুৰ শব্দই বিহু অহাৰ আগজাননী দিয়ে। মৰমৰ বিহুৱান খন নিজ হাতেৰে বৈ চেনাইলৈ বুলি আলফুলে সাঁচি ৰখা হয়। বিহুত আপোনজনক নিজ হাতেৰে বোৱা গামোচাখন দিয়াৰ আনন্দকনেই সুকীয়া।
আজিকালি গাঁৱত তাঁতৰ শালৰ ঠাইত ডাঙৰ ডাঙৰ উদ্যোগ গঢ়ি উঠাৰ ফলত মেছিনত বোৱা গামোচাৰ প্ৰভাৱ বৃদ্ধি পাইছে।আগতে জীয়ৰীহঁতে গাঁৱত বিহুৰ আখৰা কৰে।ঢোল পেঁপাৰ মাতে গা সাতখন আঠখন কৰে। কিন্তু আজিকালি তাৰ ঠাইত দেখা গৈছে, বিভিন্ন অনুষ্ঠান গঢ় দি পইচা খৰচ কৰি বিহুৰ আখৰা ঠায়ে ঠায়ে আৰম্ভ কৰিছে। বিহুৰ পৰম্পৰা যেন দিনক দিনে হ্ৰাস পাবলৈ ধৰিছে।গাঁৱৰ বিহু ক্ৰমে চহৰমুখী হৈছে।চোতালৰ বিহুৱে মঞ্চত বেছিকৈ ঠাই পাইছে।সেয়েহে দেখা গৈছে যে বিহুৰ ক্ষেত্ৰটো বহুত পৰিৱৰ্তন আহি পৰিছে।আজিকালি বিহু অহাৰ আগজাননী প্ৰকাণ্ড হৰ্ডিংচ আৰু অনলাইনৰ বিভিন্ন ৰেহাই মূল্যত দিয়া বস্তুৰ বিজ্ঞাপনৰ পৰাহে পাওঁ।আগতে বহাগৰ আগে আগে নতুন নতুন গানৰ কেছেট ওলায়।ঘৰে ঘৰে বজাই বিহু অহাৰ আগজাননীয়ে ঘৰখন বিহু মুখীয়া কৰি তুলে।এটি সুকীয়া আমেজ এই বিহু কেছেটৰ পৰাও পোৱা গৈছিল। বিহু নামৰ লগত কৃষি, তাঁতশাল, নীতি-নিয়ম আদিকে কৰি বহু কাহিনী জড়িত হৈ আছে।আজিৰ প্ৰজন্মই বহু বস্তু চিনি পোৱাটো বাদেই নামেই হয়তো শুনি পোৱা নাই।বৰ্তমান আমাৰ জাতীয় কৃষ্টি সংস্কৃতি ৰক্ষাৰ ক্ষেত্ৰত ৰঙালী বিহু যেন ক্ৰমে প্ৰতিযোগিতালৈ পৰিৱৰ্তন হৈছে।
প্ৰকাশ পালে অসমীয়া ফ্লিপিং আলোচনী শব্দ-সাঁকোৰ বসন্ত বিশেষ সংখ্যাটি। আলোচনীখন পঢ়িবলৈ তলৰ Download লিংকত ক্লিক কৰক।
আলোচনীখন পঢ়ি কেনে পালে আমাক জনাবলৈ নাপাহৰিব যদি ভাল পালে আনকো পঢ়িবলৈ শ্বেয়াৰ কৰি দিব ।
No comments:
Post a Comment