অসমৰ অন্যতম সাহিত্য চৰ্চাৰ গোট শব্দ-সাঁকোৰ পঞ্চম বাৰ্ষিক অধিৱেশন
যোৰহাটতস্থিত প্ৰীতম ভৱন তথা লেখিকা সমাৰোহ সমিতিৰ স্থায়ী ভৱনত যোৱা ১১ নৱেম্বৰ শুক্ৰবাৰে অসমৰ অন্যতম সাহিত্য চৰ্চাৰ গোট শব্দ-সাঁকোৰ পঞ্চম বাৰ্ষিক অধিৱেশন সফলতাৰে সমাপ্তি ঘটে। পুৱা দহ বজাৰ পৰা আৰম্ভ হোৱা অধিৱেশনত বন্তি প্ৰজ্বলন কৰে বৈষ্ণৱ সাহিত্যিক লক্ষীৰাম দুৱৰা দাসে। সভাপতিত্ব কৰে বিশিষ্ট সাহিত্যিক মৃদুল শইকীয়াই। অসমৰ প্ৰায় প্ৰতিখন জিলাৰ পৰা অহা সাহিত্যনুৰাগী প্ৰতিনিধি সকলৰ উপস্থিতিত সুন্দৰকৈ অনুষ্ঠিত হয় বাৰ্ষিক অধিৱেশন । দিনজোৰা কাৰ্যসূচীৰে অনুষ্ঠিত উক্ত বাৰ্ষিক অধিৱেশনত আঁত ধৰে শব্দ-সাঁকোৰ সম্পাদক ৰিতু ভৰালীয়ে।
উক্ত অধিৱেশনত কেইবাখনো গ্ৰন্থ উন্মোচন কৰা হয় ক্ৰমে হৃদয়ৰ আত্মকথা, আবেলি বেলি, সপোনৰ জোনাকী বাট,এৰাসূঁতিৰ পাৰত বহি, বহুদিন হ'ল নদী দেখা নাই আৰু সঞ্চালক দাদুমণি বৰাৰ লগতে মুখ্য সম্পাদক মনশ্ৰী হাজৰিকাৰ দীৰ্ঘ দিনীয়া ফচল অসমৰ অন্যতম শব্দ-সাঁকো সাহিত্য চৰ্চাৰ গোটৰ দ্বাৰা প্ৰকাশিত ৰিতু ভৰালী আৰু মনশ্ৰী হাজৰিকাৰ সম্পাদনাত "শব্দ-সাঁকো" বাৰ্ষিক আলোচনীৰ ছপা সংখ্যাকে ধৰি মুঠ ৬ খন গ্ৰন্থ উন্মোচন কৰা হয়। শব্দ-সাঁকো আলোচনীখন উন্মোচন কৰে শিল্প ৰত্ন বঁটা প্ৰাপক পঙ্কজ বৰুৱা গায়নে । বিশিষ্ট অতিথি হিচাপে টীয়ক শাখা কবি সন্মিলনৰ সম্পাদক বিমান শইকীয়া দেৱ উপস্থিত থাকে আৰু বিশিষ্ট বক্তা হিচাপে উপস্থিত থাকে ক্ৰমেঃ ৰিয়াৰানী দত্ত,অলি বৰুৱা,ৰমেন শইকীয়া,অনিমা নেওগ আৰু ধন দাস।
এই অনুষ্ঠানত অসমৰ কেবাগৰাকী কবি তথা সাহিত্যি-সংস্কৃতিৰ লগত জড়িত ব্যক্তিক আনুষ্ঠানিক ভাৱে বিভিন্ন বঁটাৰে সন্মানিত কৰা হয়। সেই সকলৰ ভিতৰত “নাৰায়ণপুৰৰ সীতা দেৱীক কাব্য ৰাগিনী উপাধি, ডিব্ৰুগড়ৰ ৰাজশ্ৰী সেনাপতি গগৈক কাব্য নন্দিনী উপাধি আনুষ্ঠানিক ভাৱে প্ৰদান কৰা হয়।
তাৰোপৰি আড়ম্বৰপূৰ্ণ এই অনুষ্ঠানতে দিপ্তী নাথক বৰ্ষশ্ৰেষ্ঠ গল্পকাৰ সন্মান আৰু ববী পাটগিৰীক বৰ্ষশ্ৰেষ্ঠ সমাজ কৰ্মী আৰু নিৰঞ্জন দাসক বিপ্লৱী সাংবাদিক সন্মানেৰে বিভূষিত কৰা হয়। আৰু শব্দ-সাঁকোৰ সাহিত্য সৌৰভ বঁটা ক্ৰমেঃ জ্যোতিপ্ৰসাদ শইকীয়া,গীতা বৰা, হিৰণ্য দত্ত,দীপিকা দাস,দীলিপ পৰাজুলিক প্ৰদান কৰা হয়। উৰ্বশী মৰাণ,ৰূপালী গগৈ চুতীয়া,পাহাৰী শইকীয়া,স্বৰ্ণালী গগৈ আৰু জ্যোতিকা দেউৰীক সাহিত্য প্ৰেৰণা বঁটা প্ৰদান কৰা হয়।
লগতে এই অনুষ্ঠানটি সংগতি ৰাখি অমূল্য চেতিয়া আৰু বিকি কৰ্ণাণীক শব্দ-সাঁকো পৰিয়ালৰ তৰফৰ পৰা বিশেষ সম্বৰ্ধনা জনোৱা হয়।
লগতে সদৌ অসম ভিত্তিত আয়োজিত অণুগল্প প্ৰতিযোগিতাৰ বিজয়ী সকলক পুৰস্কাৰ প্ৰদান কৰা হয় । আমন্ত্ৰিত কণ্ঠশিল্পী প্ৰণৱ প্ৰতিম নাথ আৰু জিতুমণি দাসে গীত পৰিবেশন কৰে , দুইজনকে 'শব্দ- সাঁকো'ৰ পৰিয়ালৰ তৰফৰ পৰা সন্মান জনোৱা হয় । অসমৰ বিভিন্ন প্ৰান্তৰ আমন্ত্ৰিত কবি ক্ৰমেঃ বৰষা কাশ্যপ,সীমা দাস,ৰেখা বৰকটকী,পংকজ দাস,লোকেন্দ্ৰ কুমাৰ দাস,অমৰজিৎ হাজৰিকা,বিকি নেওগ , গীতাশ্ৰী বৰা,জয়শ্ৰী বৰা,বিশ্বজিৎ দাস আৰু ৰিছা কলিতাৰ কণ্ঠত শৰতৰ আৰু আঘোণৰ কবিতা পাঠ হয় ।
সদৌ শেষত 'শব্দ-সাঁকো'ৰ সঞ্চালক দাদুমণি বৰা আৰু সভাপতি জ্যোৎস্না বৰা শইকীয়াৰ অলেখ কষ্টৰ বিনিময়ত আৰু সম্পাদক ৰিতু ভৰালীৰ শলাগৰ শৰাইৰে “শব্দ-সাঁকো'ৰ পঞ্চম বাৰ্ষিক অধিৱেশন” সফলতাৰে সামৰণি পৰে ।
